Meri Pyari GuNn...

Meri Pyari GuNn...

Begum rasoikhane mein kudhe hi ja rahi thi...
Mann hi Mann badhbadhaye ja rahi thi...
"Pehle Saas, seene pe mong dalti thi aur ab yeh buddha meri jaan nahi baksh raha"

Subah hi subah RaJ Babu jo aa dhamakte the ghar pe...
Ik kadak Coffee ke liye...
Sirf gharbhar ko Salaam kehna, Ik Cup Coffee peeni, Dua deni aur kisi baat se koi wasta nahi...
Barso se yeh Silsila chalta aa raha tha...
GuNn-Ammi ke jannat jaane ke baad bhi...

Kehne ko to GuNn-Ammi ke aashiq hua karte the...
Isliye main unhein RaJ Babu hi bulata tha...

GuNn-Ammi ke saath shuru hua jo subah ki Coffee ka silsila aaj tak thama nahi tha...
Chahe Gurudware mein mattha tekna reh jaye, akhbaar chuut jaye, mausam chahe kitni bhi kalakari dikhai...
Par RaJ Babu ka Coffee prem nahi chutata tha...
Wahi kursi... Wahi baramde ki kone wali jagah...
Unko aaj bhi lagta tha GuNn-Ammi unke saath Coffee pi rahi hai...

Pichale teen dino se RaJ Babu ghar Coffee peene nahi aaye the...
Begum unke bistar pe lagne ki khabar sunkar hairaan-pareshan thi...
"Hamdard Khatun boli... Aadmi se badkar koi tumhara davakhana thodi na hai... Chalo RaJ Babu ko dekh aate hai... Sang Coffee bhi Ketali mein le chalte hai.."

Bistar pe aankh band karke lete hue RaJ Babu, bagal mein unki betiya Sukrane ki Dua padti hui...
Halchal se jag uthe... Dekh kar mujhe Begum sang bahut khush hue...
Begum ne Coffee nikaal kar cup mein di, par unhone nahi pi...
Unki betiya boli... "Main to Roz Coffee banakar deti hun, par peete nahi... Kehte hai GuNn ke bina Coffee aachi nahi lagti"

Eka-Ek uthkar mere ghar aane ki zid karne lage...
Kisi tarah Car mein baithakar ghar laye gaye...
Wahi kursi... Wahi baramde ki kone wali jagah...
Wahi haath mein Coffee ka piyala liye... Pehle ghuut ke saath Zindagi ki aakhiri saans bharte hue...

Aaj bhi Meri Begum unke liye Coffee ka Cup banati hai...
Aaj bhi main Sahil unke liye wahi kursi... Wahi baramde ki kone wali jagah sajata hun...

Barson se yeh Silsila chalta aa raha hai...
Na jaane kab thamega...

- RaJ